Davao City – Gikumpirma ni Mindanao Development Authority Public Relation Head Dr.Adrian Tamayo nga migawas na ang executive order No.64 nga nag-establisar sa Barter Trade Council sa Mindanao human pirmahi ni Pangulong Rodrigo Duterte.
Subay ani, segun ni Dr.Tamayo nga hugot na sab nangandam ang ilang buhatan alang sa opisyal pagsugod sa barter trade pipila ka semana gikan karon hilabi na kun mahitsas na ang tanang palisiya.
Matud ni Dr.Tamayo, mahimong partner sa Barter Trade ang Indonesia, Malaysia ug Brunei kung asa ang maong mga nasud magpadala sa ilang mga basic commodities products dinhi sa Mindanao.
Ug kung mahitabo kini, aduna na unya’y supisyenteng suplay sa bugas, asukal ug daghan pang uban ang Mindanao sanglit dili naman sila malisdan sa pagpasulod sa ilang mga produkto sa islang saad.
Lauman nga mas mubarato na unya ang mga palaliton tungod aduna naman unya’y igong suplay sa mga basic commodities ug mahunong na sab ang smuggling activity sa atong dapit.
Samtang, ang Mindanao magpadala og mga produkto agrikultura sama sa saging, lubi, pinya, ug uban pa nga maoy gikinahanglan sa tulo ka mga nasud ning panahona.
Sa tan-aw pa ni Dr.Tamayo, magkunhod na ang kasamtangang inflation rate sa Mindanao kung mag-arangkada na ang barter trade council sa Mindanao.
RadyoMaN Joel Viray
