Nagkasundo ang Department of Budget and Management (DBM) at House Committee on Appropriations na alisin ang ₱35 billion na pondo para sa infrastructure projects na nakapaloob sa unprogrammed appropriations sa ilalim ng 2026 national budget.
Inihayag ito ni Committee Chairperson Rep. Mikaela Suansing sa pulong ng House Budget Amendments Review Sub-Committee.
Ayon kay Suasing, ang ₱35 billion ay bahagi ng ₱80.86 billion na pondo para sa Strengthening Assistance for Government Infrastructure and Social Programs (SAGIP) na bahagi ng unprogrammed appropriations.
Sabi ni Suansing, dahil dito ay ₱45 billion na lang ang maiiwan sa SAGIP na nakatuon lang sa mga social programs.
Nilinaw naman ni Suansing na hindi maaring alisin sa unprogrammed funds ang infrastructure funds na suporta sa foreign assisted projects upang hindi mabahiran ang commitment ng Pilipinas sa ating partners tulad ng World Bank, Asian Development Bank, Japan International Cooperation Agency.
