Kill Joy o KJ ra ang siudad?
Pangutana sa mga manginumay ug manabakuay, kini subay sa bag-ong aprobadong ordinanasa nga mag limit sa inom ug sigarilyo sa dakbayan sa Butuan.
Ipatuman na sugod Hulyo 18 ning tuiga ang Ordinansa nga mag “regulate” sa pagbaligya sa mga ilimnong makahubog ug sigarilyo.
Kini ilalom sa SP Ordinance 5297-2017 nga napasar sa Sangguniang Panglungsod ug giaprubahan ni Mayor Ronnie Vic Lagnada niadtong Hulyo 7.
Basi sa maong ordinansa gidili na ang mosunod: Ang pagpainum sa ilimnong makahubog sa atubangan sa mga sari-sari stores; Pagbaligya ug bino og sigarilyo sa mga menor de edad bisan pa ug gisugo lamang kini sa ilang ginikanan; pagbaligya ug bino lapas alas onse ang takna sa gabii ug ang pagbaligya ug ilimnong makahubog nga walay igong business permit.
Sa mga makalapas sa maong ordinansa pahamtangan kini ug silot nga mokabat sa 1 thousand pesos sa unang paglapas, second offense dos mil pesos, 3rd offense 5 mil pesos ug pagrevoke sa business permit sa ika-upat nga paglapas.
Giklaro ni Police Senior Inspector Paul Paden, Hepe sa Police Station 1 nga dili lang sari-sari store kundili tanang establisamento lakip mga bar ang sakop sa SP Ordinance 5297 -2017 nga nagdili sa pagbaligya ug ilimnong makahubog lapas sa alas onse ang takna sa gabii ug ang pagpamaligya nga walay business permit.
Niya pa sugod sa adlawng Martes, Hulyo 18 hingpit nang ipatuman ang maong ordinansa.
Madumduman nga ang maong SP Ordinance napasar sa Sangguniang Panglungsod nga gipangamahan ni Konsehal Ehrnest John Sanchez ug giaprubahan ni Mayor Ronnie Vic Lagnada niadtong Hulyo 7.
