ZAMBOANGA CITY—Un grande tienda ya man uput todol adentro parte del edificio durante el insendio ya sosede del Miercoles denoche hasta ya puede espaga conel fuego ayer madrogada ya.
El insendio ya sosede na Maker Sale Center locao na Governor Camins Avenue costao del un gasoline station.
Na report del bumbero ta aparese el quema ya comensa banda alas 10 del noche.
El insendio ya responde el monton truck del bumbero y cuantos maga water truck desde na maga privado compania.
Durante ta precura apasigua conel fuego el maga bumbero, ya puede sabe el que fuego ya comensa abaho parte del edificio y ya man calayat na entero portion del tienda.
Base na report, ya uput el todol cosa ta bende el tienda despues nohay puede hace sale afuera porcaosa dayun ya queda bien grande el fuego y nupuede mas entra ningunus adentro.
Esta maga momento el maga investigador del bumbero alomenos sabe si cosa el causa del quema y cuanto el destroso. – Dan Toribio
