Davao City – Hinumdumon ugmang adlawa, Oktubre 10 ang International Day of Girl Child.
Sa pakighinabi kang TALIKALA Executive Director Jeanette Ampog atol sa tulumanong Serbisyong Straight to the Point uban si RadyoMaN Misel Miral Galve, matud niya nga adunay mga pinasahi nga kinahanglan ug mga giagiang pagsulay nga ginaatubang ang mga babae nga pinasahi sa mga batang lalaki.
Busa buot nila kini hatagan og pagtagad diin usa na dinha ang pagtubag o unsa pag paibsan sa problema nila sa reproductive health partikularminte ang teenage pregnancy.
Usa matud pa ka kawsa niini mao ang mga batang ginabilin sa balay nga ginapabantay og mga bata o igsuon diin ang ubang ginikanan ginaingnan ang mga anak nga training matud pa kini sa ilang pagdako apan wa matud pa masayod ang uban nga usa kini sa mga rason og nganong ang kabatan-unan sayong maabrihan ang panghuna-huna bahin sa teenage pregnancy o sayong magkapamilya ba karon.
Sa padayong pakighimamat sa director, makasubo usab ang impormasyon nga dunay mga highschool students nga biktima sa sexual harassment bugti sa grado ingon man mga biktima sa human trafficking ug online prostitution diin ang uban mismong miyembro sa pamilya ra usab ang nagabugaw sa mga bata.
Panawagan karon sa TALIKALA ngadto sa mga ginikanan nga dili ibutang sa alanganin ang mga anak inay giyahan ang mga bata ug dili pasagdan nga maguba ang ilang kaugmaon.
Ang TALIKALA usa ka non-government organization nga nagaprotekta sa katungod sa kababayen-an ug kabatan-unan nga nahitumpawak o nahimong biktima sa sex exploitation, human trafficking ug prostitusyon.
RadyoMaN Renz Barbarona
