Malipayon na usab nga gi-anunsyo ni Ms. Asma Akmad, ang program manager sa Serbisyong Sarangan Community Outreach Program ilalum sa buhatan ni Governor Steve Chiongbian Solon, ang mahitabo nga mobile screening sulod sa Kapitolyo sa Sarangani alang sa mga kabataan nag-edad dise-otso (18) anyos paubos nga adunay diperensya sa ilang mga tiil, kadtong adunay club foot og bowed legs, og uban pang balatian sa kamot, kabukugan og mga post-burn scars.
Karong Abril 12 kini matigayon sa Kasfala Hall sulod sa Sarangani Capitol. Pangunahan ang mobile screening sa nabantog na nga international hospital nag-inusarang naka-basi sa dakbayan sa Davao gitawag nga Tebow CURE Hospital, ang espesyalista sa pag-opera sa diperensya sa kabukugan o orthopedics.
Club foot og bowed legs mao ni sila kadtong pilo ang mga lapa-lapa gikan sa pagka-anak og kadtong mga bakang og kimpi. Samtang ang post-burn scars ang mga dagkong uwat tungod sa pagkasunog sa lawas.
Mapasalamaton si Program Manager Akmad tungod kay nibunga matud pa ang ilang pagpaningkamot sa pagpanguna ni Governor Solon nga ma-ayudahan ang panginahanglan sa panglawas sa mga katawhan pinaagi sa mga partner local, national og international charity organization.
Niagi matud pa sa pagsugod, ang gobernador ang gapang-imbita sa mga non-government organization apan ning panahuna sila na ang gaadto sa Sarangani aron ipaambit ang ilang mga programa og serbisyo. Taod-taod na nga partner sa Sulong Kalusugan program ang Tebow CURE Hospital.
