Ginkalipay sang Malakanyang ang resulta sang pagtuon sang US-based hink tank nga Pew Research Center nga kadam-an sang mga Pilipino ang padayon nga nagapati kay Pangulong Rodrigo Duterte kag sa iya anti-drug war.
Kadunghan sini, ginpamilit sang Malakanyang nga wala sang untat ang mabaskog nga kampanya sang Duterte Administration batuk sa ilegal nga droga.
Ginpahayag ni Presidential Spokesman Ernesto Abella nga indi mag-untat ang gobyerno sa “war on drugs” tubtub indi mabungkag ang drug apparatus kag matinluan ang mga dalanon sa pinakakatapusan nga drug pusher kag mapriso ang tanan nga drug traffickers.
Base sa nasambit nga findings sang international study, nagaguwa nga nagustuhan sang mga Pilipino si Pangulong Duterte kag generally popular ang iya anti-drug war.
Sa survey, 86% sang mga Pilipino ang may positibo nga opinyon kay Pangulong Duterte , 41% ang nagsiling nga “very favorable” samtang 12% lamang ang naghambal nga indi nila gusto ang Presidente.
Ang Pew Research Center ang nag-interview sang 1,000 ka mga pilipino humalin sang pPebrero tubtub Mayo 2017 para sa ila Global Attitudes Survey.
(photo from web)
