Davao City – Dakung tabang sa mga trabahante ug sa mga estudyante ang internet ug ang gadgets kay madali ang ilang trabaho ug paghimo sa mga assignments kun ensakto ang katuyoan.
Sa laing bahin, nagdala usab og dili maayo nga epekto ang internet ug ang gadgets sa kinabuhi sa mga trabahante ug sa mga estudyante kay puwede malangay ang ilang trabaho ug assignment.
Ang mga magtutudlo nagka-problema sa mga estudyante nga adik na sa internet ug sa paggamit og gadgets gumikan sa negatibong epekto sa pagtuon.
Matud sa usa ka public school teacher nga si Rodelyn Mateo nga ang mga bata kinsa pirme sa internetan dili makatarong sa pagtuon mao nga sagad kanila, bagsak sa final grading.
Dili unta dautan ang internetan kung ang katuyoan sa mga estudyante mao ang pagtuon ug paghimo sa mga assignments apan ang problema magbilar og dula og online games mao nga usahay dili na maka-eskwela.
Sumala ni Mateo, ang mga estudyante sa sekondarya maoy sagad maadik sa internetan diin ang uban tuyuon ang pagsibat ug dili musulod sa klase aron magdula og games sa computer.
Gihagit sa magtutudlo ang mga ginikanan nga giyahan ang ilang mga anak sa ensaktong paggamit sa mga gadgets og oras sa pag-adto sa internetan aron dili madaot ang ilang pagtuon.
Giingon ni Grade 1 teacher Eladia Salomon nga daghan sa mga estudyante karon wala nay focus ug atensyon sa klase tungod sa negatibong epekto sa impluwensiya sa internetan ug gadgets.
Namatikdan pa ni Salomon nga daghan sa mga kabataan karon wala nay batasan ug respeto sa mga ginikanan ug sa mga magtutudlo tungod sa dula sa internet ug sa gadgets.
Tambag ni Mateo ngadto sa mga ginikanan mao nga limitahan ang ilang mga anak sa paggamit og gadgets ug sa pag-adto og internetan aron dili madisturbo ang ilang pagtuon.
RadyoMaN Joel Viray
