Davao City – Wala unta nag-urada og hukom si Pangulong Rodrigo Duterte sa pagsira sa mga investment schemes sama sa Kabus Padatuon Community Ministry International Incorporated kun KAPA ni Joel Apolinario hangtud dili mahatag ang due process nga gigarantiya sa batakang balaud sa nasud.
Kini maoy nahimong reaksiyon ni outgoing Magdalo Partylist Representative ug Defeated 2019 Senatorial Candidate Gary Alejano sa pakighinabi sa DXDC RMN Davao kaniya pinaagi sa telepono.
Segun ni Alejano nga una unta nagdesisyon ang Presidente gisayod sa una ang sitwasyon sa mga investment schemes ug gihatagan og kahigayonan nga makasumite og mga rekisitos sa buhatan sa Securities and Exchange Commission aron mahimong legal ang ilang operasyon.
Alang ni Alejano nga dili maayo ang iyang pagsanong dayon sa pangutana ni Pastor Apollo Quiboloy ug pagmando sa NBI UG CIDG nga wala pa mabati ang bahin sa mga tawo nga nangyawat og dakong tubo gikan sa mga iskema nga ilang gilagakan og kapital.
Kung mao pa unta kadto ang gihimo sa pamuno-nasud dili unta makoloran ang iyang desisyon nga mipabor kini sa iyang higala nga si Quiboloy maong wala na niini nakunsidera ang pagbati sa lungsoranon nga nagsalig lamang sa mga eskema.
Awhag sa Opposition Congressman kang Pangulong Duterte nga paminawon na ang yangungo ug hangyo sa katawhan karon ug hatagan og kahigayonan nga mabalik ang operasyon sa mga investment schemes ug tabangan silang makakuha og mga permits sa SEC.
Wala gipadaplin ni Alejano ang kamahinungdanon sa pagsunod sa balaud sa nasud apan angay sab talinghugan ang hangyo sa katawhan ngadto kaniya nga tugotan makabalik sa operasyon ang mga iskema nga dungan nang gi-cracked down karon sa mga otoridad.
RadyoMaN Joel Viray
