Investment schemes sa DavNor gi-inspeksyon

Davao City – Duha ka mga gituohang investment scheme operating establishments ang personal nga gi-inskpesyon sa kapulisan nahitabo Mayo 30, 2019 sa Davao del Norte.

Unang gi-inspeksyon ang GP Load and Wellness Products Marketing nahimutang sa Tagum City nga nakapangalan sa usa ka Ernesto Benedicto dela Cruz Obero.

Gikanayon ni Police Regional Office (PRO) 11 Regional Director BGen. Marcelo Morales, mamahimo gihapon kining maka operate human adunay napakitang DTI permit ug Mayor’s Permit kun business permit ang magduha ka bulan.


Sumala niini, kinahanglan lamang nila i-comply ang BIR Permit aron maka release kini og resibo ngadto sa ilang mga kliyente sanglit naka rehistro sila isip sole proprietor ug wellness marketing diin sila nagabaligya og welness products, loads, personalized mobile phones, ug uban pa.

Nasayran nga sa maong kompanya, adunay P2,000 minimun nga membership ug maximum nga P50,000.

Una nang gikanayon sa manager nga si Wynna Obero nga dili sila usa ka investment scheme.

Apan sa interbyu sa usa ka alyas, Ronron, membro niining kampanya, giingon niini nga wala siyay produktong nadawat ug kwarta lang ang iyang gi-invest.

Matud niini nga ika-upat na niya kining higayon nga mag payout ug adunay 30 diyas una kini makuha.

Ikaduhang gi-inspeksyon ang Rigen Marketing nahimutang sa Carmen, Davao del Norte.

Matud ni Mae, usa ka trainee retailer niadtong Mayo 23 pa lamang sila nag abli gani ginapamilyar pa ang mga produktong ilang ginabaligya.

Sa pagpangayo ni Davao del Norte Provincial Police Office Director PCol. Ferlu Silvio og sample sa ilang produkto, gitataw sa mga retailers nga wala pa naabot ang ilang mga produkto gani usa lamang sa pad sa tabletas nga produkto ilang napakita.

Nasuta nga walay DTI permit ang maong establisemento apan adunay BIR ug business permit.

Subay niini, giawhag sa hepe sa PRO 11 ang tanang responsableng ahensiya nga sutaon ang maong mga business establishments ug gipaniguro nga magpadayong ang ilang pagsuta sa mga gituohang investment schemes.

Una nang gipamahayag ni Morales nga tumong lamang nila masigurong legal nga naga operate ang mga establisemento ug luwas sa pagpangilad ang publiko.

RadyoMaN Jason Amisola

Facebook Comments