Davao City – Padayong naniid karon ang Criminal Investigation and Detection Group (CIDG-XI) sa tanang mga investment schemes nga sekretong naga-operate dinhi sa siyudad sa Davao.
Matud ni Police Major Milgrace Driz, tumong sa monitoring mao ang pagseguro nga wala nay mabiktima pa diha sa mga iskema nga mibutho dinhi sa rehiyon.
Dugang ni Driz, wala na sila’y namonitor nga mga investment companies nga padayong nag-operate sa sekreto nga mga lugar dinhi sa dakbayan.
Gani, bisan ang napasirad-an napahunong na mga investment schemes wala na’y nangahas mangabli pag-usab human gironda ang ilang mga buhatan.
Gipasabot ni Driz nga ang bisan kinsa nga mudawat og investment nga walay pagtugot sa Securities and Exchange Commission (SEC) mag-atubang gayud og kasong kriminal nga may tugbang nga silot nga pagkapreso ingon man multa.
Nasabtan ni Driz ang kalisud sa katawhan hinungdan nga nangiyawat na lamang sila nga muharuhay pinaagi sa pagbutang og kapital sa mga iskema bisan og mabutang sa risgo ang ilang salapi.
Tambag usab sa maong opisyal ngadto sa tanan nga dili mupatoo nga sayron ang legalidad sa kumpanya nga butangan sa ilang kapital aron dili magsaliuoang sama sa nahitabo sa uban human wala sila mabaliki sa ilang gibubo nga kwarta.
Dugang ni Driz, dili dayon magpadala ug motoo sa i-presenta nga mga dokumento nga xeroxed copy lang inay mas maayo nga i-demand ug tan-awon kadto gayod nga orihinal nilang permits or lisensya.
Gidasig ni Driz ang tanan nga gilayon mutaho sa mga police stations sa ilang mga dapit kung adunay susama nga modus operandi aron mahunong na ang ilang pagpangilad sa katawhan.
RadyoMaN Joel Viray
