Davao City – Subay sa unang adlaw sa ika-18th City Council, gilatag sa bag-ong Indigenous People’s Mandatory Representative (IPMR) ang iyang mga plataporma.
Sumala ni Councilor Cherry Ann Ortiz-Codilla, una niyang tutokan ang edukasyon sa mga IPs pinaagi sa mga scholarship programs.
Subay niini, aduna siyay ginaduso nga free boarding house alang sa mga IP students nga mu-eskwela sa kolehiyo dinhi sa siyudad diin naka-identipika na sila og 50 ka mga estudyante nga maka-avail niini.
Gipasabot sa bag-ong nanumpa nga konsehal nga dili igo ang scholarship lang gumikan nagkinahanglan gihapon sila og laing butang sama sa mapuy-an aron masustinir kini.
“Since this (education) is one of the major problem that the IP students are facing right now, although they will get scholarship programs but to sustain their needs during their stay here in the city is a big hindrance for them to finish their studies in college,” segun niini.
Dugang ni Codilla, padayon pa silang ga-identipika sa posibleng lokasyon sa maong boarding house diin duol lang usab sa eskwelahan sa IP students.
“As of now, waiting nami sa appointment for formality purposes but we are already drafting and looking for partners. We really need many partners para matabangan atong mga IP students,” awhag niini.
Samtang gibutyag sa representante gikan sa Bagobo-Klata tribe nga gi-aprubahan na ang IP desk nga usa usab sa plataporma niining Health Program.
Gani, malaumon si Codilla nga masugdan ang iyang mga plataporma karong tuiga diin lakip na niini ang livelihood program, agriculture ug indigenous domain diin dakong makabenepisyo ang nagkadalaing netibong grupo.
Kahinumdoman nga nanumpa si Codilla kaniadtong Abril 27, 2018 ug opisyal nga nag sugod sa pagpanerbisyo karong adlawa.
RadyoMaN Jason Amisola
