IPCU-SPMC Chair: Pagmaniobra sa RT-PCR result way kamatuoran

44

Davao City- Hugot nga gibarugan sa mga health officials nga walay pagmaniobra sa mga resulta sa mga RT-PCR test diin sa mga alegasyon ginatuyo og positive sa COVID-19 ang mga nagpa-swab.

Sa eksklusibong interbyu sa RMN Davao kang Dr. Marie Yvette Barez, chair of the Infection Control and Prevention Unit sa Southern Philippine Medical Center (SPMC), nga igo lamang nilang gidawat ang mga resulta sa RT-PCR test.


“Unsaon man namo pagmanipulate nga wala man miy labot sa laboratory ug ginahatag lang na sa amoa ang results ug dili man sad kami ga-swab,” sumala ni Barez.

Gihagit ni Barez ang mga dili mutuo sa COVID-19 nga mupuli na lang kanila aron ilahang masayran gayod ang tinuod nga kalisod nga ginaagian sa mga frontline medical workers ug ang sitwasyon sa pasyente sa COVID-19 sulod sa SPMC.

“Nganong himu-himoan mana namo? Gikapoy nami. Kung pwedi lang gyod nga wala nay COVID, negative nalang tanan para everybody happy. Dili pa mi makapoy, dili mi magpulaw ug dili nami mag sige’g sol-ob og PPE nga pirteng inita. Kung dili sila mutoo, sila diri, sila puli,” matud niini.

Gibutyag ni Barez, mamahimong i-request nila ang mga resulta sa ilahang RT-PCR ug magpresenta lang og ID’s silbing pamatuod sa ilahang identity tungod gikonsidera kining confidential ang mga resulta.




Samtang, segun ni Dr. Ashley Lopez, DOH Davao City Health COVID-19 focal person, giingong mga misinformed ang mga taong gasulting ginatuyo og positibo ang mga resulta sa swab test.

Tambag sa mga health officials sa katawhan, dili basta-basta lang mutuo og mga istorya nga walay igong basehan ilabina sa social media.

Sumala ni Barez, maminaw sa mga specialists ug i-refer ang mga impormasyon sa COVID-19 sa mga legitimate sources sama sa World Health Organization, Department of Health, Philippine Society for Microbiology and Infectious Diseases ug Philippine College of Physicians.

RadyoMaN Aimee Guinita

Facebook Comments