IPHO South Cotabato ginapahanumdom sa tanan nga indi solusyon sa problema ang pagpakamatay, mental health program nagapadayon sa tunga sang COVID-19.

Ginapalab-ot ni Provincial Health Education and Promotion kag Mental Health Program Coordinator Hannah Ebeo sa mga pumuluyo sa probinsya nga indi solusyon ang paghikog sa mga ginaatubang nga problema sa tunga sang COVID-19 pandemic.
Ini matapos sang sunod-sunod nga insidente sang suicide sa probinsya nga sang nagligad pa nga tuig makabig nga alarming na tungod yara sa 11-anyos tubtob 60-anyos ang nagapakamatay.
Samtang suno kay Ebeo nagapadayon ang mental health program sang IPHO amo nga gin-establisar ang online counseling paagi sa programa nga Danggapanay sa COVID-19 agud nga magbulig sa mga may problema, nakabatyag sang kamingaw kag kasubo sa tunga sang pandemya.
Ginpahayag niya nga epekto sang quarantine nga mas nagtaas ang anxiety kag stress kon ngaa nagdamo ang kaso sang suicide incident sa probinsya halin sang bulan sang Hunyo.
Advice niya naman sa tanan nga kon may problema ang mangita sang tawo nga masaligan nga pangayuan sang bulig kag maistoryahan sang problema nga indi maglab-ot sa punto nga utason ang kabuhi.
Hingyo niya naman sa tanan nga mangin responsable sa pagpost sa social media nga malikawan ang triggering factor.
Pahayag niya nga lakip sa mga aktibidad sang IPHO subong nga tuig sa mental health program ang pagpatigayon sang symposium kag orientation sa tagsa ka mga eskwelahan ugaling lang tungod sa COVID-19 pandemic wala ini natigayon.