Nakahanda ang Integrated Provincial Health Office sa posible pagsulod sang bag-o nga strain sang coronavirus disease.
Suno kay Provincial Health Officer Dr. Rogelio Aturdido Jr. nakapreparar man ang mga government kag private hospital sa probinsya kon magdamo ang transmission sang nasambit nga virus.
Paklaro man ni Dr. Aturdido nga pareho sa gihapon ang sintomas sang bag-o nga variant sang COVID -19 kasubong sang ubo, sip-on, lagnat , sore throat, palanakit sang lawas, madula ang panlasa kag iban pa, apang ang kinalain lamang suno pa sang virus amo nga paspas ang transmission.
May-angot sini, ang pagsunod gid sa minimum health standard sang mga pumuluyo suno sa iya ang importante agud malikawan ang madasig nga transmission sang virus.
Sa subong suno kay Dr. Aturdido ginabantayan nila ang posible pagsaka sang kaso sang COVID -19 sa probinsya tungod sa selebrasyon sang paskwa kag bag-ong tuig nga mahibaluan sa ikatatlo nga semana sang Enero.
Ginkumpirmar man sang Provincial Health Officer nga may bastante pa nga COVID-19 testing ang probinsya sang South Cotabato.
