Magaumpisa sang timprano sa ila nga monitoring sa firecracker-related injury ang Provincial Surveillance Unit sang Provincial Health Office sang South Cotabato nga base sa ila nga naplastar umpisahan ang reporting sa Disyembre 1 tubtob Enero 5, 2020.
Suno kay Provincial Surveillance Unit Officer Celia Lorenzo katuyuan sini agud nga basehan nila ini sa himuon pa nga istratehiya nga mapabakod pa gid ang oplan paputok campaign upod ang mga concern nga ahensya sang gobyerno matapos nga ang sa national level magaumpisa ang monitoring Disyembre 21 tubtob Enero 5 sa masunod nga tuig.
Sa South Cotabato suno kay Lorenzo yara sa 11 ka mga hospital ang sakop sang ipatuman nga online reporting sang madala nga mga biktima sang palupok sa nagahilapit nga selebrasyon sang paskwa kag bag-ong tuig.
Samtang ang reporting naman sa mga biktima sang tetanus infection bangud sa palupok ang tubtob naman sa Enero 28 sa masunod nga tuig matapos nga indi man gilayon mahibaluan.
