Davao City – Hugot nga gipangandaman karon sa National Commission on Indigenous Peoples (NCIP) ang umaabot nga piniliay sa bag-ong Indigenous Peoples Mandatory Representative (IPMR) sa konseho kini human matapos karong Nobyembre 30 ang hold over capacity ni Bai Halila Sudagar nga nagsugod niadtong Hunyo 30.
Sumala ni NCIP-Davao Provincial Officer Cristituto Ingay, una nila karong ginaplastar ang komposisyon sa ‘Talaukom’ kun Council of Elders kinsa responsable sa pagsuta sa mga gusto mukandidato isip IPMR diin kinahanglan kini magpasa og Certificate of Genealogy.
Nasayran nga sa ulahing piniliay diin midaog si Bai Cherry Ann Codilla, dili tanan membro sa Council of Elders usa ka Klata gani walay tarong ang pagberipika sa mga kandidato hinungdan nga wala gihatagan og Certificate of Affirmation si Codilla.
“Naay uban Ovu Manuvo, Tagabawa, so karon ginalimpyohan namo atong records,” segun sa Provincial Officer.
Ang Talaukom kun Council of Elders gilangkuban sa usa ka tribal chieftain, walo ka tribal council, representante sa IP-Youth ug IP Women sector nga gikan sa Bagobo-Klata ug laing lima pa ka elders ug sa kinatibuk-an adunay 15 ka mga miyembro ang council.
RadyoMaN Jason Amisola
