Report ni: Jennifer Palomo Debaja
Nangin inspirasyon sang isa ka Ilongga OFW sa HK ang pag attend sa Financial Literacy Seminar sang CARD Hong Kong Foundation rason nga nag umpisa ini sang “IPON CHALLENGE” kag nakatipon sang balor $21,760 ( P140,000 pesos ) sa sulod sang anum ka bulan.
Nursing graduate sa University of Iloilo si Jalyn Villagonzalo Navio, 39 anyos kag tumandok sang Linaywan Badiangan, Iloilo kag kamanghuran sa anum ka mag ulutod.
Miembro man sang RMN Iloilo Fansclub HK Chapter si Jalyn kag masobra na 16 ka tuig nga naga trabaho sa Hong Kong.
Tungod sa inagihan nga kapigaduhon kag para makabulig sa pamilya, nagtinguha ini nga mag apply pa Hong Kong. Dugang man nga nagtulod sa iya agud mag abroad amo ang pag under estimate sang mga kakilala nga wala siya sang nahibaluan nga obra.
Likum sa ihibalo sang iya pamilya, nag pasimpalad si Jalyn bilang OFW sa HK sang tuig 2002 sa bulig sang iya pakaisa.
Apat katuig siya nga nag serbisyo sa una nga employer kag sang nagtaliwan ang bed -ridden nga ginabantayan nagsaylo ini sa amo Kon sa diin 12 na siya ka tuig nga naga obra kag gin trato siya bilang miembro na sang pamilya.
Sa HK$ 8,200 o (P54,000 pesos ) nga monthly salary ni Jalyn, P10,000 pesos sini ang gina padala nga allowance para sa iya hinablos nga siya ang naga paeskwela.
Suno pa kay Jalyn, kon sang una mahilig siya magshopping kag mag treat sa mga abyan, subong preparasyon para sa iya pag for good ang iya ginatagaan sang importansiya.
Apisar wala nagmadinalag-on ang iya married life sa seaman nga ex husband tungod natapos man sa pagbulaganay, inspired naman ini sa handum nga negosyo sa iya pag pauli.
Sa karon, na umpisahan na ni Jalyn ang next challenge, sa diin indi lang $20 notes kundi pati na $50 notes ang iya ginatipon. Excited na ini sa mangin outcome sang masunod nga challenge.
Good luck Jalyn, kabay mangin inspirasyon ka pa sa madamo nga OFWs.
