iRecalls 2019: Serye sang pinatyanay sa Negros Oriental

46

Sa sulod sang halos isa ka bulan, sang kapin 20 ang nagkalamatay bangud sa asud asud nga shooting incident sa probinsya sang Negros Oriental. Kalabanan sa mga suspek sa pagpamatay ang ginapatihan riding-in-tandem:

June 30 sang ginpatay si Eleuterio Solis, katapo sang CAFGU sa syudad sang Guihulngan.


July 3 sang gintiro patay si Andy Castor sa pareho man nga syudad.

July 7 sang gintiro sang riding-in-tandem si Salvador Romano samtang nagasakay sa iya motorsiklo sa banwa sang Manjuyod.

July 9 sang ginpatay si Geraldo Lopez sang riding-in-tandem sa Guihulngan City

July 10 sang gintiro sa pareho nga syudad si Kelly Aragones.

July 13 patay ang isa ka lalaki nga ginapatihan katabo sang NPA sa encouter sa tropa sang gobyerno sa banwa sang Ayungon.




July 18 sang gin-ambush ang apat ka mga pulis sang ginpatihan katapo sang NPA sa banwa man sang Ayungon. Nakilala ang biktima nga sanday Corporal Relebert Beronio, Patrolman Raffy Callao, Patrolman Ruel Cabellon kag Patrolman Marquino de Leon. Nagapatigayon sang covert operation kag anti-insurgency mission ang apat sang ginpatay sang mga rebelde.

July 22 sang nag-attempt nga magsuicide ang kapitan sang Barangay Mabato, Ayungon nga si Sunny Caldera pinaagi sa pag-inom sang pesticide. Si Caldera ang kapitan sang nasambit nga barangay kun sa diin ginpatay sang mga katapos sang NPA ang apat ka pulis. Sang amo man nga adlaw gin-ako sang Mt. Cansermon Command sang NPA ang sila ang may kahimu-an sa pagpatay sa apat ka miyembro sang Regional Mobile Group. Nagtaliwan ang kapitan matapos ang isa ka adlaw.

July 23 sang gin-ambush patay si Atty. Anthony Trinidad sang sa syudad sang Guihulngan. Nagamaneho ini sang salakyan gikan sa isa ka hearing sa La Libertad sang gintiro sang mga suspek. Pilason naman ang iya nga asawa.

July 24 sa banwa sang Zamboangita, patay ang duha ka lalaki lakip na ang isa rebel returnee. Patay man sa sini nga adlaw si Felimino Residente, presidente sang United Calango Farmers Association. Patay man sang gintro si Malmstein Fabugais sa Barangay Bajumpandan, Dumaguete City.

Kaagahon sang July 25 sang ginpatay si Arthur Bayawa, principal sang isa ka science high school sa Guihulngan kag manghod sini nga si Ardale Bayawa, opisyal naman sang DepEd sa amo nga lugar. Pasado las otso sang amo man nga adlaw sang ginpatay si Romeo Alipan, kapitan sang Barangay Buenavista sa Guihulngan. Sa amo man nga adlaw sang gintiro sang riding in tandem si Reden Eleuterio sa banwa sang Ayungon. Gintiro patay man si Raklin Astorias sa banwa sang Siaton sa amo man nga adlaw.

Nasapwan man nga nagalutaw-lutaw sa banwa sang Sibulan si alyas Sherwin nga tumandok sang Ayungon. Antes pa man matapos ang July 25, ginsulod ang pamilya Ocampo sa ila puly-an sa banwa sang Santa Catalina. Patay ang amay nga si Marlon Ocampo kag ang iya isa ka tuig nga bata. Pilason naman ang iya asawa kag isa pa ka anak.

Para sa mga dalagku-an nga mga balita lokal nga nagkalatabo sa tuig 2019, magpamati sa iRecalls 2019, January 1, las 11 sa aga tubtob las dos sa hapon sa 94.3 iFM Bacolod.

Facebook Comments