Ironman 70.3 malampuson, hapsay

Davao City – Nagmalampuson ang Alveo Ironman 70.3 triathlon nga gipahigayon dinhi sa syudad sa Davao adlaw’ng Domingo, Marso 24.

Kini mao ang assessment ni Public Safety Security Command Center (PSSCC) deputy head Angel Sumagaysay atol sa interbyu kaniya sa Davao media diin nahimong epektibo ang gipatumang security plan sa mga awtoridad.

“Yung security plan na gi-prepare nato pag implement ato halos tanan na materialize maong nahimong very successful ang pagsecure sa atong Ironman 70.3 2019,” segun niini.


Gikanayon ni Sumagaysay nga walay dagkong kakulian nga nahitabo karong tuiga gani gipasalamatan niini ang Eastern Mindanao Command, Police Regional Office (PRO) 11, Task Force Davao, Davao City Police Office (DCPO) ingon man ang Philippine Coast Guard-Davao.

Mapasalamaton usab ang maong deputy head ngadto sa Davao Del Norte Provincial Police Office, 10 Infantry Division Philippine Army, ug 1003rd Brigade alang sa paghatag og asistensiya sa pagpatuman sa seguridad ingon man pagplastar sa mga alternatibong ruta.

Sa pikas bahin na-comply sa City Transport and Traffic Management Office (CTTMO) ang ilang gipatumang road closures atol usab sa maong aktibidad sa tabang sa 350 ka mga enforcers nga ilang gideploy.

Sumala ni CTTMO Chief Dionisio Abude nga adunay upat lamang ka mga sakyanan ang ilang na-tow gikan sa dalang F. Torres paingon sa Lanang ning syudad.

“Nisuporta gyod ang mga establishments nga atong gipangtagaan og information gikam sa F Torres paingon sa Lasanag kay wala man gyoy nag Illegal Parking basin bago lang to sila naabot ang mga na tow pero halos 99% nag follow man,” pasabot niini.

Samtang gisaysay ni Sports Development Office ilawom sa City Mayor’s Office (SDO-CMO) office in charge Mikee Aportodera nga positibo ang feedback sa mga atleta ingon man sa mga nanan-aw sa maong lumba.

Adunay pipila nga nagubaan og bisikleta sama ni Mauricio Mendez, Alveo Ironman 2018 champion, kinsa wala na kapadayon sa maong aktibidad.

Nasayran nga anaa sa kapin 2,200 ka mga atleta ang mipartisipar sa karong tuig nga Ironman gikan sa 38 ka mga nasud ug gilauman nga mu-doble pa ang ihap niini sunod tuig.

Nangandam na usab ang lokal nga panggamhanan alang sa umaabot nga duha ka dagkong aktibidad nga mahitabo dinhi partikular ang PRISAA Meet ug Palarong Pambansa.

RadyoMaN Jason Amisola

Facebook Comments