Isa ang kumpirmado nga patay kag siyam ang nakaluwas matapos hinali lang nga nagdaludo ang mabaskog nga ilig sang tubig sa Nadsanjan Falls sa barangay Pasi, Igbaras, Iloilo kaina sang hapon.
Ginkilala ang napatay nga si Julie Delgado Magbanua, 30 anyos sang barangay Jalaud Norte, Zarraga, Iloilo nga nakaaguym sang pilas sa ulo nga ginapatihan naglampus sa bato sang gin-anud sang tubig.
Ang siyam nga mga nakaluwas amo naman sanday Jefferson Dilag, 24 anyos; John Efren Octaviano, 26 anyos; John Denver Añon, 22 anyos; Eddie Delfin, 30 anyos; Bryan Ortega, 26 anyos; Rolando Pineda, 31 anyos; Reymark Doro, 25 anyos; Robert Villaflor kag si Kent John Panisales, 20 anyos lunsay pumuluyo sang barangay Jalaud, Norte, Zarraga.
Ginpahayag nga naghagaray ang napulo ka mga natungdan nga magpaligo sa Nadsanjan Falls kag kahapon sang hapon samtang nagapaligo ang mga ini sang hinali nga nagdaludo ang mabaskog nga tubig kabangdanan nga naanud ang mga ini.
Gindala pa ang ini sa Guimbal District Hospital apang ginbawian sang kabuhi si Julie Magbanua.
