Isa ka 32 anyos na inahan patay sa Dengue!

680

Kumpirmado na namatay an isa ka inahan na 32 anyos ,taga P.Ilang Ilang,brgy. Ipil,Surigao City nan jadton milabay na Domingo Sept. 8,2019. An biktima nakilay-an na isa ka Daisy Leal Nomos,may duha ka anak. Sa eksklusibo na pakighinabi nan RMN Surigao sa bana nan biktima na si Jade Nomos,ini mibutyag na nakasinati nan hilanat sanan pagsakit sa uyo an ija asawa sa milabay na Lunes sanan nagdumili ini na mokadto sa ospital bisan pa sa ija pag awhag tungod sa pagtoo na ini bughat lamang.Mikadto pa isab sila sa manambayon sa brgy. Mat-i pagka Biernes pero pagka Sabado, petsa 7 nan Septiembre gidaya na an biktima sa pribadong ospital tungod kay migrabe an sitwasyon nan ini na amoy rason sa ija pagkamatay nan pagka sunod na adlaw,Domingo,Sept 8. Hinungdan sa kamatayon sa biktima sumaya sa Attending Physician na si Dr. Manolito Go amu an Dengue Hemorrhagic Fever. Kasamtangan pa na taghaya an patayng lawas sa biktima sa ila panimayay sa brgy. Ipil sanan gikatakda ini na ilubong sa Sept.19. Utro na isab nagpahimangno kuman an kadumayahan sa marajaw na panglawas sa publiko na dili magkumpyansa kon ugaling makasinati nan sintomas sa dengue labina an panakit sa uyo,kalawasan iban sa taas na hilanat na kinahanglan magpatan aw dajon sa doktor para malikayan an pareho na nahitabo sa 32 anyos na nanay. ( RadyoMaN Romy Salut Brinquuez)

Facebook Comments

From Advertisers