Nagdeklarar sang state of calamity ang council sang Barangay San Isidro, Koronadal sa ginpatigayon nga emergency meeting kahapon nga adlaw matapos nga malala nga naapektuhan sang pagbaha sang Hulyo 28 tungod sa pagbubo sang mabaskog nga ulan. Ini ang kumpirmasyon ni Brgy. Kapitan Lloyd Gabutin.
Suno sa opisyal ini agud makahatag sang ayuda ang barangay sa mga residente sini nga apektado sang nasambit nga kalamidad.
Base sa ila nga datos suno kay Kapitan Gabutin yara sa 140 ka mga pamilya ang apektado kag 15 naman ka mga panimalay ang totally damaged tuga sang pagbaha sang tinalikdan nga adlaw.
Sa subong suno sa kapitan nagatinir sa ila mga himata ang mga nawad-an sang puluy-an nga mga residente sang Purok Pagkakaisa sa nasambit nga barangay.
Ginpahayag niya man nga ginpaalerto niya ang mga residente sa mga apektado nga lugar sa tion nga maglain ang panahon.
