Roxas City, Capiz- Arestado ang isa ka foreign national matapos nga nagbayolar sa ginapatuman nga curfew hour pasado alas onse sang gab-i sa Burgos Street corner Jovita Fuentes Street sakop sang Brgy Inzo Arnaldo Roxas City.
Ang amu nga persona ang nakilala kay Paul Beckett y William, 67-anyos ang pang-edaron kag citizen sang pungsod New Zealand sa diin temporaryo lamang nga naga-istar sa Calipayan St Brgy Punta Tabuc, Roxas City.
Ang amu nga persona ang nagasakay sa motorsiklo sang ginharang sang grupo nanday acting punong barangay Ervin Sicad kag mga BPAT member sini.
Sang ginpamangkot, ginrason sang amu nga persona nga magabakal lamang ini sang food supply sa pihak sang dis-oras na sang kagab-ihon.
Ginpahayag pa ni Beckett nga wala ini sang labot sa curfew kabangdanan nga ginpakamaayo na lamang nga ipahamtang anay ini temporaryo sa crisis center sang syudad sa Brgy Inzo.
Mahibaloan nga maathag nga nabutang sa ginpapanaog nga Executive Order number 16 ni Capiz Governornor Nonoy Evan Contreras nga hugot nga ginabawal ang pagguha sang sin-oman halin alas 9 sang gab-i tubtob alas 4 sang kaaganhon maluwas na lamang sa pila ka mga kabangdanan kasubong sang emerhensya.
