Tapaz, Capiz – Isa ang patay samtang duha ang pilason sa bungguanay sang ambulansiya kag unit sang Calinog Bus Line(CBL) sa Barangay Malitbog, Tapaz, Capiz kahapon sang hapon.
Ginbawian sang kabuhi samtang ginabulong sa ospital ang driver sang ambulansiya nga ginkilala kay Joemarie Gasis, 39-anyos, alas 10 kagab-i.
Samtang nag-angkon man sang kapilasan sa lawas sanday Charlyn Distajo, 24-anyos kag ang 12-anyos nga bata nga lalaki nga lunsay pasahero sang CBL.
Suno sa impormasyon nagikan sa kapulisan sang Tapaz, patal nga pilas sa ulo kag utod ang tiil sang driver sang ambulansiya samtang nag-angkun naman sang minor injuries ang duha ka pasahero sang CBL. Nagapalanakit ang kalawasan sang duha ka mga pasahero sang bus liner kabangdanan nga gindala man ang mga ini sa ospital.
Nahibaluan nga padulong kuntani sa Barangay Malitbog, Tapaz ang ambulansiya agud nga nagresponde sa nakuryente apang paglab-ot sa amo nga lugar gulpi lamang nga nagbunggoanay ini kag ang bus liner nga halin sa Calinog padulong man sa Tapaz.
Sa subong yara na sa paghinakop sang kapulisan sa Tapaz MPS ang driver sang bus liner nga ginkilala kay Jomary Gello, 35-anyos.
Ginapatihan nga ginlikawan ni Gello ang naga-park nga tricycle apang wala sini makalkula ang manibela kag nabunggu gid sa kasugata nga ambulansiya.
Samtang kalakip man sa nabungguan sang CBL ang balay nga yara sa kilid sang karsada nga ginapanag-iyahan ni Florencio Pareño.
