Ginbutang sa hard lockdown ang Villanueva Plains Subdivision, Zone 1, Brgy Libertad, Surallah, South Cotabato base naman sa desisyon sang Local IATF Surallah tungod sa pinakauna nga kaso sang delta variant nga narekord sa banwa.
May-angot sini, ginpatuman ang One entry kag One Exit policy umpisa Agosto 24 tubtob Agosto 31subong nga tuig.
Nagdeploy naman sang police personnel sa area upod ang BPATS sang Brgy Libertad, Health Personnel kag MDRRMO Personnel agud masiguro nga wala sang mga residente sa nasambit nga lugar ang makaggwa para mapunggan ang paglapta sang virus.
Ginkumpirmar ni Surallah Mayor Antonio Bendita nga base sa ginpatigayon nga contact tracing kahapon sang aga yara sa 30 ka tawo ang may close contact sa pasyenti nga ipaidalom naman sa COVID test subong nga aga.
Pahayag sang alkalde nga posible tungod sa pagbisekleta nga nagapadulong sa iban nga lugar ang rason kon ngaa nalatnan sang delta variant ang pasyenti.
Samtang, ginsiguro ni Mayor Bendita ang paghatag sang ayuda sa mga apektado sang hard lockdown kag nagpanawagan man sya sa mga paryenti sang mga residente sa lugar nga dul-ungan man ang mga ini sang ayuda
Ginahingyo man sang local IATF Surallah ang kooperasyon sang katawhan sa implementasyon sang hard lockdown kag ginapahanumdom sa pagsunod sang minimum health protocols sa tanan nga tion.
