SIPALAY CITY- Napatay sa shootout sa ciudad sang Sipalay ang miembro sang Epogon robbery group nga isa sa mga suspek sa pagsulod sa balay kag pagpatay sa Belgian national sa ciudad sang Bacolod sang nagligad nga tuig.
Pebrero 19 sang kaagahon sang gin-operate sang Regional Special Operations Group, Rregional Intelligence Division, CIDG Negros Occidental, 604th company sang Regional Mobile Force Battalion 6 kag 15th Infantry Battalion, Philippine Army si Eddie Epogon, 25-anyos sa Sitio Manluy-a, San Jose, Sipalay City. Si Epogon ang may warrant of arrest sa kaso nga robbery with homicide.
Sa interview sang DYHB sa hepe sang Sipalay City Police Station nga si Police Major James Latayon, ginplano sang husto ang pag-operate kay Epogon bangod makapila na nila ka beses nga ini ang gin-operate apang indi matyempuhan.
Ginsaysay ni Latayon nga sang namutikan ni Epogon nga napalibutan siya sang mga operatiba ginpaguwa sini sa ila balay ang iya bata kag asawa kag nagpinalupok kag diri na nagbalos ang operating groups nga nagresulta sa pagkamatay sini.
Ginpahayag man ni Latayon nga isa si Epogon sa mga suspek sa pagsulod sa balay kag pagpatay sa Belgian national nga si Carl Nolens sa Villa Angela Subdivision, Brgy. Villamonte, Bacolod City sang Hunyo 17, 2020. Madumduman nga apat ka mga suspek ang nagsulod sa balay nga nagpangawat kag nagpatay sa biktima nga foreigner.
[image: image.png]
