Patay ang isa sa tatlo ka mga suspek sa robbery hold-up matapos nagbato sa mga pulis sa Brgy. Tabugon , Dingle pasado alas 5:00 Dominggo sang kaagahon, Pebrero 9.
Suno kay Police Capt. Fernando Punzalan Jr., hepe sang Dingle PNP, nakabaton sila sang report angut sa pagpang-hold up sa Brgy. Camambugan sa diin ginkilala ang mga biktima nga sanday Hilda dela Cruz sang Brgy. Poblacion kag Lena Mogat sang Brgy. Caguyuman nga lunsay halin sa belasyunan.
Ginsundan ini sang isa pa ka pagpang-hold up sa Brgy. Tabugon sa diin isa ka senior citizen nga masimba kon tani ang nabiktima nga ginkilala kay Tita Fuentes .
Bangud sini, nagpatigayon sang hot pursuit operation ang Dingle PNP .
Suno kay Punzalan nga ginparahan sang mga pulis ang nagapadulong nga motorsiklo sakay ang tatlo ka suspek apang wala ini nagpondo .
Nagpalupok sa mga pulis ang isa sa mga suspek kabangdanan nga nagbalos ang mga otoridad .
Nakaangkon sang patal nga igo sa tuo nga bahin sang ulo ang suspek nga gintunaan sang iya kamatayon.
Suno pa kay Punzalan nga natigayon nga makilala ang napatay nga suspek nga amo si Dominic Tresas, 22 anyos sang Rizal Ilawod, Calinog, Iloilo pinaagi sa utod sini nga si Ronald Tresas.
