Dipolog City – Subli na usab karong giawhagan ang mananagat dinhi sa dakbayan sa Dipolog ni City Agriculturist Engr. Jose Kerr N. Porlas sa dili una pagbaling sa isdang tuloy sugod niadtong Disyembre 1, 2018 ngadto sa Marso 1, 2019.
Matud pa ni Engr. Porlas, nga ang BFAR (Bureau of Fisheries and Aquatic Resources) Administrative Circular No. 255, series of 2014, nga hugtanong gadili sa pagkuha o pagbaling sa isdang tuloy sulod sa conservation area atol sa ‘closed season’ niini ang hugtanon na usab karong gipatuman dinhi sa dakbayan.
Katuyoan matud pa niini mao ang pagpreserbar sa isdang tuloy ug malangsi ilabi na dinhi sulod sa kadagatan sa Zamboanga del Norte, diin nahilakip ang dakbayan sa Dipolog ug kini ang gikinahanglang buhaton ilabi na dinhi sa kadagatan sa siyudad gumikan kay kini ang makatabang sa dugang pagpalambo sa industriya sa “bottled sardines” sa Dipolog
Dugang pang gipaklaro, nga sulod ning nasangpit nga mga bulan, mao kini ang ting-bihod sa isdang tuloy ug malangsi busa kinahanglan nga kini pagabantayan nga dili pagakuhaon aron sila maka-itlog, nga mao’y mopuli sa mga dagko nga nakuha sa pagpanagat.
Alayon niini, hugtanong gi-awhag ni Engr. Porlas ang tanang mananagat sa pagsanong ning maong balaod aron dili mamultahan.
