Gitangtang na sa City Government of Valencia ang istriktong Enhance Community Quarantine sa Barangay Lumbayao.
Base sa Executive Order no. 36 nga gi-isyu ni Mayor Azucena Huervas nga gikan sa pagka ECQ, gipailawom na lang ang mao nga barangay sa General Community Quarantine kon GCQ epektibo Abril 27 ning tuiga.
Sa press conference gibutyag ni Vice Mayor Pol Murillo nga ilang girekomenda ang paglibkas sa EQC human nga na-cleared na ang mao nga barangay.
Apan ubos sa kondisyon nga himoon pa gihapon ang medical status review sa mga PUMs ug PUIs sa mao nga barangay pinaagi sa Disease Surveilance Team ug pagpahigayon sa extensive decontamination sa kadalanan, barangay hall, barangay health center ug covered court.
Dugang sa bise mayor nga padayon gihapon ang lockdown sa tulo ka mga gisutang panimalay kung asa adunay PUIs nga resulta sa direktang contact sa kumpirmadong pasyente sa COVID-19.
Himoon ang lockdown sulod sa 21 ka adlaw gikan sa katapusang adlaw nga nakitaan sa sintomas o kaha gikan sa adlaw kung asa nag negatibo ang resulta sa specimen.
