Davao City – Gipusil ang usa ka lalaki samtang nag bantay sa iyang sari-sari store alas 7:00 sa kagabhion didto sa Purok 1 Bryco Bankerohan Brgy 5-A.
Sumala sa report gikan sa San Pedro Pnp ang biktima naila sa pangalang Mahid Andang Cali, 27 anyos nagpuyo sa may Bankerohan ug lumad sa Barangay Balaigai, Lumbayanague Lanao del Sur samtang ang suspek nailang si Kabir Carbal, hingkod ang edad ug nitibo sa nahisgutang barangay sakop sa Lanao del Sur.
Sa imbestigasyon sa kapolisan ang biktima igo lang nagbantay sa iyang tindahan ug kalit niabot ang suspek dayon gipusil sa ulo ang biktima.
Gisulti sa witness nga paryente sa biktima nga positibo ang suspek nga maoy nagpusil kang Cali.
Base sa blotter, human sa hitabo ang suspetsado daling misibat padulong sa usa ka sakyanan nga color black pick-up nga gi-park sa may Quirino St.
Dugang saysay sa witness nga kauban sa suspek ang iyang mga anak nga nagsilbing look-out nga mao sila Muamar Hassim, Abdul Cabal ug mga anak nailang alyas Mamasao ug Bato Carbal.
Nigawas sa imbestigasyon sa kapolisan subay sa pamahayag sa witness nga ang motibo pagpusil sa suspek ngadto sa biktima adunay kalabutan matud pa bangi sa isyung politika.
Narekober sa kapolisan gikan sa crime scene ang usa deform slug nga bala.
Ang biktima padayon nga nagpaalim sa balay tambalanan diin anaa kini sa kritikal nga kondisyon sa karon.
Radyoman Don Pulayao
