Gipasirado na usab sa Local Government Unit sa lungsod sa Manolo Fortich ning probinsya sa Bukidnon ang J.A mining ventures nga nahimutang sa Barangay Tankulan, sa mao nga lungsod alas 10 sa buntag kagahapong adlawa.
Ang mao nga pagpasirado sa LGU uban sa pakiglambigit sa PNP Manolo Fortich, BFP Manolo Fortich, pinasubay sa Republic Act. No. 7160, kung asa gimanduan ang mga opisyales ug empleyado sa pagpahunong sa operation sa mao nga establishment tungod kay nag operate kini nga walay hingtungdang business permit gikan sa mayor ug bisan sa munisipyo.
Gikatahao nga mukabat sa 353 ka tawo sa mao nga lungsod ang naka-invest sa mao nga pyramiding scam kung asa mukabat ngadto sa kapin kon kulang sa P3,631,900.00 ang kinatibuk-ang cash ang na investas of June 29,2019.
Mahinumduman nga kaniadtong Huwebes, gironda sa CIDG Bukidnon ang JA mining ventures nga nahimutang sa Malaybalay City, Valencia City, ug lungsod sa Maramag.
Una niini, sa interview sa RMN ngadto kang Police Major Bernardo Edgardo, ang hepe sa CIDG Bukidnon gibutyag niini nga ang unang J.A mining ventures unang nagbutang ug buhatan sa Valencia City apan wala kini permit gikan sa SEC aron mag-solicit ug kwarta.
Matud ni Major Bernardo nga wala pa may usa ka bulan, nagbutang na usab kini ug laing buhatan sa Malaybalay ug Maramag maong gi-applayan na sa CIDG ug search warrant tungod daw wala na kini mahadlok sa pagsolicit ug kwarta ug nagpasalig pa sa 50% nga interest kada bulan.
