Davao City – Alang sa kontra partidos ug mga kritiko sa kagamhanan, dakung problema karon ang paghuot sa nagkadaiya nga prisohan sa tibuok nasud nunot sa kampanya kontra droga ug kriminalidad.
Apan alang sa Philippine Drug Enforcement Agency (PDEA)-Davao Region, usa kini ka maayo nga balitang miabot kanila tungod kay nagbunga ang ilang sakripisyo ug paningkamot sa giyera kontra droga ug kriminalidad.
Gikalipay ni PDEA XI Spokesperson Noli Dimaandal ang taho nga misaka og 600 porsento ang paghuot sa mga presohan karon kay mao kana ang ebidensiya nga nagtrabaho sila ug ang nasudnong kapulisan.
Gipasabot ni Dimaandal nga seryoso ang ilang ahensiya nga batukan ang kanser ug tambalan ang sakit sa katilingban nga mao ang suliran sa droga.
Ang ilegal nga droga daw midaut sa maayong kaugmaon sa nasud ug sa mga kabataan karon diin tungod niini daghan sa mga bag-ong tubo karon naglunang sa mga kriminalidad luyo sa kalinghod sa edad.
Ang pagtipunsisok sa mga piniriso karon nagpasabot lang nga nagmadaugon ang gobyerno sa giyera sa droga ug krimen ug hayan sa dili madugay mapukan na gayod ang sindikato sa droga nga naglihukan sa Pilipinas.
Gipamahayag pa ni Dimaandal nga igo nila gisunod ang diriktiba ni Pres. Rodrigo Duterte nga gubaton ang drug syndicate samtang dili pa nila hingpit magun-ob ang kaugmaon sa nasud.
Giila sa opisyal ang dakong kontribusyon sa katawhan diin mihangyo pa kini sa publiko nga ipadayon ang pagpaabot og impormasyon ngadto nila sanglit mao kini ang susi aron hingpit mudaog ang gobyerno sa giyera kontra droga ug mapukan ang mga sindikato.
RadyoMaN Joel Viray
