Magapatuman sang traffic re-routing sa Distrito sang Jaro umpisa alas 6 sa aga sini nga Pebrero 2 ang Public Safety and Traffic Management Office ukon PSTMO angut sa kapiyestahan ni Nuestra Seniora dela Candelaria.
Ginpahayag ni Mr. Jeck Conlu, head sang PSTMO nga ang mga depasahero nga salakyan ang iga-re-route kag indi na makalabay sa palibot sang Jaro Plaza apang puwede pa maka-agi ang mga pribado nga salakyan.
Pag-abot naman sang alas 4 sa hapon kon sa diin pagahiwaton ang prusisyon, pagasiraduhan na sa tanan nga salakyan ang palibot sang Jaro plaza.
Ginpahanumdum ni Conlu sa mga may salakyan nga indi mag-parking sa bisan diin lang sa mga dalan malapit sa sentro sang okasyon bangud may yara sila sang towing truck nga maga-operate agud halinon ang mga salakyan sa eksakto nga parkingan.
