Dead on arrival ang 38anyos nga job order sa Munisipyo sang Tupi alas 8:00 sang nagligad nga gab-i sa Barangay Palian, sa nasambit nga banwa.
Ginkilala ni Police Chief Inspector Bernie Faldas, Hepe sang Tupi MPS ang biktima kay Cezar Sandigan Andalinog, 38anyos, may asawa J.O. sang Tupi, residente sang Sitio Dahal, Barangay Palian sa nasambit nga banwa.
Naguwa sa ila ginhimo nga imbestigasyon, papauli na ang biktima halin sa iya trabaho sakay sa iya HaoJue nga tricycle, nagaduag sang pula may plaka 1201171131 kaupod an gang iya sini asawa kag duha ka menor de edad, sang hinali na lang nga ini nga ginluthang sang duha ka suspek nga naglabay sa iya kilid.
Bangud sa insidente nakaangkon sang pilas ang biktima tuga sang pagpangluthang sa iban nga parte sang iya lawas nga nangin tunaan sang hinali sini nga kamatayon.
Samtang maswerte naman nga wala naulamid ang asawa kag duha ka menor de edad nga upod sang biktima.
Madasig naman nga nagpalagyo ang mga suspek sakay sa wala plaka nga motorsiklo.
Ginpaidalom naman sa laboratory examination ang narekober nga duha ka basiyo sang calibre 45 nga armas luthang nga nakuha sa crime scene.
Kaangot sini ginpahayag ni Faldas nga blangko pa sila sa identity sang mga suspek bangud wala nakita sang mga testigo ang nawong matapos madasig suno pa ang mga panghinabo.
