Halos present niaging adlaw nga Miyerkules, Nobyembre 6, ang mga gobernador ug city mayor nga naglangkob sa RPOC kon Region 12 Peace and Order Council aron sabayan ang pagpahigayon og meeting sa North Cotabato PPOC o Provincial Peace and Order Council, natigayon kini sulod mismo sa Kapitolyo sa North Cotabato sa may Amas, Kidapawan City.
Segun ni Sultan Kudarat Governor Teng Mangudadatu, ang chairman sa RPOC sa Rehiyon Dose, ilang gituyo ang pagpahigayon og joint meeting sa RPOC ug sa North Cotabato PPOC aron sayron kung unsa pa ang panginahanglanon sa probinsya sa North Cotabato human na-sentro kini sa pag-igo sa sunod-sunod nga makusog nga paglinog.
Buot ipadangat ni Governor Mangudadatu ngadto kang North Cotabato Acting Governor Vice Governor Lala TaliƱo-Mendoza nga pwede kining mag-assign sa matag probinsya ug syudad sa Region 12 kung unsa pa ang panginahanglanon sa mga residente aron matabangan kining ma-aksyunan sa mga LGU sa entiro Rehiyon Dose apil na matud pa ang probinsya sa Maguindanao.
Anaa pud sa maong panagtigum ang mga gabinete ni Pangulong Rodrigo Duterte nga maoy gipatutok sa Presidente, sama nila DILG Secretary Eduardo AƱo, Defense Secretary Delfin Lorenzana ug DOH Secretary Francisco Duque.
Mapasalamaton na lamang ang gobernador sa Sultan Kudarat nga walay dakong damyos nga nahitabo sa ilang probinsya susama usab sa probinsya sa Sarangani. Gipasalamatan niini ang tanan nga paspas nakapadangat sa ilang mga tabang.
Sa bahin ni Sarangani Governor Solon, gibutyag niini nga nagpadala dayon kini og mga personahe ilalum sa buhatan ni Mr. Rene Punzalan sa PDRRMO Sarangani aron mulangkob sa Regional Damage Assessment Team kauban ang OCD kon Office of Civil Defense nga maoy ni-assess sa mga lugar sa Kidapawan, Tulunan ug Makilala, North Cotabato human sa paglinog atong Oktubre 31.
Nagpadala usab dayon si Governor Solon og 3,000 litros nga tubig tungod naapektuhan ang suplay sa tubig human sa pagtay-og, apil na mga tent. Atong Miyerkules, sa pagsuporta nila Vice Governor Elmer De Peralta ug sa mga board member, dala sa PDRRMO Sarangani ang dungag pa nga mga ayuda, sama sa mga kinarton nga ready-to-eat nga mga delata nga may kan-on ug sud-an na ang unod. Anaa pud ang mga social worker sa Sarangani gidumalahan ni Ms. Raquel Panal sa PSWDO nihatag og mga psychosocial intervention/psychological debriefing hilabi na ngadto sa mga kabataan nga na-trauma tungod sa panghitabo.
Apil nga nihatud sa ilang relief assistance niaging Miyerkules ang PNP Sarangani gipangunahan ni Provincial Director Col. Lex Ephraim Gurat. Segun ni Police Lt. Col. Jose Teody Condesa, ang tigpamaba sa Sarangani Provincial Police Office, nagtampo-tampo ang mga kapulisan pinaagi sa pito (7) ka municipal police station aron maka-ayuda man lang sa mga kaigsoonan sa North Cotabato.
Bisan ang liga sa mga mayor ug bise mayor sa Sarangani Province apil na ang nagkadaiyang kahugpungan sa Sarangani, lakip na ang buhatan nila Senador Manny ug Congressman Ruel Pacquiao ug OFW Family Partylist Congressman Bobby Pacquiao, ang nibuhat pud sa ilang mga inisyatibo aron makapadala sa ilang mga relief goods tungod kay dili tiaw ang nasinatian karon sa mga taga-North Cotabato, apil na ang pipila ka parte sa Davao Region, nanginahanglan sila sa atong hinabang ug mga pag-ampo.
