General Santos City–Giprayoridad karon sa Joint Task Force Gensan ang pag pakusog sa ilahang intelligence gathering kauban ang ubang ahensya sa goberno aron nga masiguro nga dili malutsan ang syudad ug bomba human nga gikumperma sa labaw sa Western Mindanao Command sa kasundaluhan nga dunay 7 ka mga international terrorist nga anaa na sa Mindanao.
Sumala pa ni Col. Eduardo Gubat ang commanding officer sa Joint Task Force Gensan nga sa matag karon ug unya nakig-alayon sila sa intel personnel ug sa ubang unit ug padayon ang ginahimong research sa field aron nga makasiguro nga luwas ang syudad sa Gensan.
Pamatuod matud pa nga duna gayuy mga terroristic activity karon ang ilahang mga kalaban mao ang sunod-sunod nga pagbuto sa bomba sa Mindanao una dinhi ang pagbusikad sa IED sa Isulan, Sultan Kudarat ug gisundan sa Indanan Sulu.
Gawas sa intel monitoring mas gipakusog usab karon sa JTF Gensan ang ilang mga check points ingon man ang ilang pagpatrolya sa ilahang area of responsibility kauban ang GSCPO.
Samtang sa kabahin sa Gensan City Police office (GSCPO) mimando matud pa si Police Col. Aden Lagradante sa iyahang mga sakop nga mas pahugtan pa ang pagbantay sa siguridad, sama matud pa sa JTF-Gensan nakig alayon usab ang PNP sa ubang unit sa gobyerno ug gipalihok ang ilahang mga intelligence personnel.
Samtang no comment man usab si Major Canoy sa hisgutanan kung kinsa ang adunay kakulangon nganong nakasulod ang mga international terrorist sa Mindanao.(Dave Silagan)
