Ka Efren, Spokesperson sang Far South Mindanao nagsurender.

Isa ka mataas nga opisyal sang Far South Mindanao sang CPP/NPA nga amo si Ka Efren, Spokesperson sang grupo kag asawa sini ang nagsurender matapos ang 26 ka tuig sa grupo.
Suno kay South Cotabato Governor Daisy Avance Fuentes naghingyo sa iya si Ka Efren nga i-secure sila sa pagbalik nila sa sabak sang gobyerno.
Rason sa pagbiya suno pa sini sa grupo ang tungod luyag na sini nga mangabuhi sang matawhay kag nagapati nga indi magdaug ang ila nga rebolusyon.
May-angot sini ginpasiguro naman ni Lt. Col. Benjamin Leander, Commanding Officer sang 27th Infantry Batallion sang Philippine Army ang seguridad ni Ka Efren kag asawa sini nga si Ka Wendy, medical staff sang grupo matapos nga yara ini sa ila kustodiya.
Ginpahayag man ni Lt. Col. Leander nga naistoryahan naman nila ang angot sa ginapangatubang nga mga kaso sini kag tanan ang magaagi suno pa sa proseso.
Ginpasiguro man ni Leander nga kapareho sang iban nga nagsurender nga miyembro sang NPA buligan man nila nga makapangabuhi sang matawhay si Ka Efren kag asawa sini kag makaavail man sang Comprehensive Local Integration Program ukon CLIP sang gobyerno.
Ginapalab-ot man ni Col. Leander sa iban pa nga miyembro sang NPA nga luyag magsurender nga bukas sila kag handa ang AFP nga buligan sila nga makapangabuhi sang tama.