Gipahigayon sa Kagamhanang Probinsyal sa Bukidnon pinaagi sa Provincial Tourism Office ang panagtigum sa Kaamulan 2020 Committee alang sa pagpangandam sa pagsaulog sa Kaamulan bag-ohay pa lamang didto sa Kaamulan Open Theater, syudad sa Malaybalay.
Personal nga mitambong sa maong panagtigum si Gov. Jose Ma. R. Zubiri, Jr. , kauban si 2nd District Board Member Melchor P. Maramara, IPMR Board Member Richard D. Macas, Provincial Budget Officer Fe Retuertas uban si Bukidnon Provincial Tourism Officer In-Charge Butch Anthony G. Melendez.
Lakip usab nga mitambong ang mga representante sa Philippine National Police-Bukidnon Provincial Office, City Police of Malaybalay, 403rd Brigade Philippine Army, Bureau of Fire Protection, Malaybalay Traffic Management Center, mga City and Municipal Tourism Officers ug mga representante sa mga munisipyo nga apil sa Kaamulan 2020 Street Dancing and Ground Competition uban ang ilang mga choreographers ug mga membro sa maong komitiba.
Sa mensahi ni Gov Zubiri, gipasigarbo niini nga mamahimong mas nindot ug sadya ang presentasyon sa matag syudad ug munisipyo nga moapil karong tuiga gumikan kay gipadak-an ang subsidy niini.
Gikan sa 500 mil ka pesos nga subsidy sa milabay’ng tuig 2019, gihimo kini karon ug 1.3 milyones ka pesos matag partisepante.
Gipangutana usab sa gobernador ang mga kadagkuan sa PNP ug 403rd Brigade kung masiguro ba niini ang seguridad sa probinsya panahon sa kaamulan kung si Presidente Duterte ang subli niini nga imbitaron isip pinasidunggang bisita.
Positibo usab ang tubag sa PNP ug 403rd Brigade nga kontrolado nila ang kinatibuk-an nga kahusay ug kalinaw sa probinsya.
