GITAKDA sa Pangagamhanang Probinsyal sa Bukidnon, pinaagi sa Sangguniang Panlalawigan, ang pagsaulog sa Kaamulan sa Marso 23 ug molungtad sa Abril 23 kada tuig.
Kini pinasikad sa Provincial Ordinance No. 2018-083R (13th SP) o “An Ordinance Fixing a Regular Schedule for Kaamulan Festival…” kung aha gi-amendahan ang Section 3 sa Ordinance No. 2007-003R (10th SP) nga giulohan ug “An Ordinance Institutionalizing the Celebration of the Kaamulan Festival”.
Sa pag-endorso ni 2nd District Board Member Nemesio Beltran, Jr., gipasabot niini nga milambo ug naila na ang Kaamulan nga gihangop sa libuan nga mga lokal ug langyaw’ng turista ug bisita matag tuig, busa gikinahanglan nga matakda ang schedule sa pagsaulog niini aron ma-plano na usab sa mga turista ug mga bisita ang ilang bakasyon, dungan sa pakig-duyog sa kasaulogan sa Kaamulan.
Nakalatid usab sa maong ordinansa nga gikan sa maong gitakda nga schedule sa Kaamulan, mamahimo kining mabalhin sa Gobernador, kung gikinahanglan.
Ang Kaamulan, usa ka selebrasyon sa probinsya sa Bukidnon kung aha magtapok ang pito (7) ka tribu nga gilangkuban sa Bukidnon, Higaonon, Talaandig, Manobo, Matigsalug, Tigwahanon and Umayamnon.
