Nagdanguyngoy sa paghilak ang mga igsuon, inahan, ug ubang kabanay samtang migakos sa lungon ni Didi Andil kon naila sa pangalan nga “Alyas Sisoy” sa kalihokan kinsa nahidangat sa old airport sa Sasa kagabii sakay sa eroplano sa Philippine Air Fore gikan sa Luzon area.
Matud sa ig-agaw-tigtagsa nga si Mario Andil nga tuig 2013 dihang misulod sa ilang Barangay sa lungsod sa Talaingod Davao Del Norte ang mga sakop sa teroristang CPP NPA NDF ug nangrecruit og mga sakop sa ilang tribu gamit ang propaganda batok gobyerno diin wala sila masayod nga naistorya na diay sa Kumander si Didi Andil hangtud nga nakumbinsi kini nga mu-uban sa kalihokan.
Segun ni Mario nga katapusan nilang nakita nga buhi si Didi sa anibersaryo sa CPP NPA NDF nga gihimo sa area sa Paquibago niadtong tuig 2016 ug human niana wala na nila higkita pa.
Suma sa amahan nga si Datu Siddil Andil nga siyam ka tuig ang ilang gipaabot nga maka-uli si Didi ug kon nakauli apan usa na ka patay karon.
Gipamahayag ni 10th ID Spokesperson Army Captain Mark Anthony Tito nga sakop sa front 53 nga naglihokan sa Davao Del Sur si alyas Sisoy kinsa nabalhin og destino sa Cagayan Valley sa Luzon area.
Dugang ni Tito, na-enkwentro sa grupo niini kinsa squad leader ang 17th Infantry Battalion sa usa ka hilit nga Barangay sa Cagayan Valley niadtong Pebrero 13,2023 kung asa napatay kini.
Busa wa’y laing gibasol ang mga kabanay kondi ang teroristang CPP NPA NDF kay kon wala pa nila unta hayloa si Didi dakong buhi pa unta kini hangtud karon.
Panawagan karon ni Captain Tito sa mga Dabawenyo nga dili ug dili gayod magpadala sa matam-is nga pulong sa mga NPA aron dili maguba ang ilang kinabuhi ug kaugmaon diin mapatay pa kon maabtan og malas sa enkwentro tali militar.
RadyoMaN Joel Viray
