Panit-an, Capiz- Ginapabugal ni Tatay Danilo Dumaan sang Panit-an, Capiz nga isa ka mabuot kag masinulundon nga bata ang anak sini nga si Dines Dumaan nga nagdaog sang bulawan nga medalya sa Pencak Silat Tanding Putra Class A Category 45-50 kg sa SEA Games sa pungsod Malaysia.
Suno sa amay, aminado ini nga sadto wala ini nagapabor sa ginapasakupan nga sports sang anak apang bangud man sa nakita sini nga determinasyon, nagdesisyon na gid lamang ang ila pamilya nga suportaran ang anak. Ginpahayag man sini nga simple gid lamang ang ila nga pagpangabuhi sa Brgy. Timpas, Panit-an, Capiz. Si Dines ang kamagulangan nila nga anak nga nagabulig sa ila trabaho sa talamnan sang tubo.
Gindugang man sang amay nga nalab-ot sang iya anak ang kadalag-an nga makakuha sang bulawan nga medalya matapos nga pila man kabeses ini nagpasakop sa nasambit nga sports event.
May kaangtanan sini, ginpanugyanan ni Tatay Danilo ang mga ginikanan nga suportaran ang ila mga kabataan sa patag sang sports nga ila pagapasakupan. Sa madumduman, nasungkit ni Dines Dumaan ang ika-24 nga bulawan nga medalya sa kampanya sang Pilipinas para sa 29th South East Asian Games.
Nagpangibabaw ini matapos nga ginlutos ang kasumpong nga atleta nagikan sa pungsod Indonesia. Magluwas kay Dumaan, isa man ka bronse nga medalya ang nakuha sang atleta nga si Rick Rod Ortega sang Panay, Capiz sa Pencak Silat Tanding Putra Class C Category sa SEA Games sa Malaysia.
