Davao City – Malaumon ang Davao City Tourism Office nga maigo niini ang target nga 250,000 ka mga turista nga mutambong atol sa pagsaulog sa ika-34th Kadayawan Festival karong bulan sa Agosto.
Sumala ni Tourism Officer Generose Tecson nga inay himuon sa usa ka semana, gipakatag nila ang mga aktibidad sa tibuok bulan sa Agosto aron dako ang oras sa mga turista nga makasuroy ingon man masulit ang pagbisita sa dakbayan.
Nasayran nga sa milabay’ng tuig, misobra pa sa target sa 200,000 ka mga turista ang nakigsaulog sa Kadayawan rason nga positibo si Tecson nga maapsan pa kini.
Dugang sa maong tourism officer nga subay gihapon sa 11 ka mga tribo sa Davao ug upat ka icons nga mao ang Durian, Waling-Waling, Philippine Eagle, ug Mt. Apo ang tema karong tuiga diin gikatakda kining mu-arangkada sa Agosto 2, 2019 sa Magsaysay Park.
Highlight sa maong aktibidad ang Indak-Indak sa Kadalanan nga mahinayon sa Agosto 17 ug Pamulak sa Kadalanan sa Agosto 24.
Gani hugot nakigkoordinar ang lokal nga panggamhanan sa deputy mayors sa matag tribu sa pagprepara sama na lamang sa pag-ayos sa mga Tribal Houses sa Magsaysay Park.
RadyoMaN Jason Amisola
