Davao City – Napili na ang mga kandidata alang sa Top 3 best cultural presentations sa Hiyas sa Kadayawan 2019.
Nagpasundayag sa ilang nagkadaiyang tribu sa gilusad nga cultural presentation ang onse ka mga kandidata sa Hiyas sa Kadayawan subay sa 34th Kadayawan sa Davao diin ang Hiyas sa Sama nga si Coraima Hasim, Hiyas sa Maguindanaon nga si Nurainie Ampatuan ug Hiyas sa Matigsalug nga si Rosephine Ambala ang tulo ka mga gideklarang mananaug.
Sa pakighinabi sa RMN DXDC Davao kang Hasim, Hiyas sa Sama, nakahilak kini sa kalipay gumikan karong tuiga nakasulod ang ilang tribu sa Cultural Presentation.
“Happy kaayo, grabeng kalipay tungod sa kadugayon nga wala nadaug ang Sama sa cultural presentation… para sakoa Maningkamot ko kay nag-commit ko being a Hiyas of Sama tribe.”
Samtang mapasalamaton si Ambala, Hiyas sa Matigsalug sa tanang misuporta kaniya ug nanghinaut nga pinaagi sa maong aktibidad, maagni niini ang mga katribu nga ampingan ang ilang kultura.
“I-preserve nato atong kultura kay mao kini atong kinaiyahan,” pag agni ni Ambala.
Wala usab nagpaiwit sa iyang mensahe alang sa katribu ug kabatan-anun si Ampatuan, Hiyas sa Maguindanaon diin hugot niya gitindugan nga dili ikaulaw ang gigikanan.
“Always preserve your identity and your faith… never ever deny your background and kung saan nanggaling, always be proud of where you came from,” mensahe ni Ampatuan.
Subay niini, giingon sa usa sa mga judges sa cultural presentation ug usa ka theater artist nga si Mario Limn nga nagpabiling dakong hagit matud pa sa mga kandidata ang pagpaila-ila sa ilang nagkadaiyang tribu ingon man unsaon kini nga mapasa sa sunod nga henerasyon.
“Sila ang ambassadress sa matag tribu, dakong hagit alang kanila kini nga ipasa nila ilang mga nakat unan sa ilang paglawig sa ilang pagka ambassadress,” segun ni Lim.
Gilusad ang maong aktibidad sa Abreeza Mall ning syudad samtang gikahinaman na usab sa mga dabawenyo ang pagsaksi sa Hiyas sa Kadayawan coronation karong August 11, 2019 sa RMC Petro Gazz Arena alas-3:00 sa hapon.
RadyoMaN Renz Barbarona
