PALO, LEYTE – Gin-aprubahan na han National Housing Authority an P4 bilyones nga pondo para han kadugangan nga 12,016 nga permanent shelters ha mga lugar ha Sinirangan Bisayas nga waray malakip ha resettlement projects nga para ha mga survivors han super typhoon Yolanda.
Sumala kan NHA Region 8 Regional Manager Rizalde Mediavillo, nag-proponer an LGU hin 15,594 nga mga bag-o nga balay pero 12,016 la an na-aprobahan han National Government gamit an pondo nga waray nagamit para han 2016 Yolanda Rehabilitation and Reconstruction Program.
Ha 12,012 nga balay, 9,516 nga unit an igtitindog ha Leyte lakip an 1500 ha Dulag, 1,616 ha Leyte, 1000 ha Barugo, 1,000 ha Tabon-tabon, 2000 ha Villaba, 600 ha Capoocan, 300 ha Dagami, 1000 ha Sta. Fe, ngan 500 ha Javier.
Ha Samar, 2500 nga mga balay an igtitindog. 1000 dinhi ha Talalora, 1000 ha Daram, ngan 500 ha Zumarraga.
Kada resettlement site in magkaka-mayada hin muti-purpose covered court ngan Training center.
Bisan pa man nag-aatubang an NHA-8 hin magkadurudilain nga issues durante han mga na-una na nga housing projects in nagpatapod la gihapon hi Mediavillo nga ig-papatuman nira hin maupay an mga proyekto pero diri daw la gihapon malilikyan nga may mga depekto.
