Pagadian City – Aminado ang kadumalahan sa Rural Transit Mindanao Inc. nga naalarma na sila sa managsunod nga aksidente sa kadalanan nga gikalambigitan sa ilang unit.
Ang ulahing digrasya ang nahitabo didto sa Brgy. Upper Tungawan, Tungawan, Zamboanga del Norte human natikalbong ang Rural Transit Bus nga dunay 28 ka mga pasahero dihang gisungag sa Mitsubishi Mirage nga miresulta sa kamatayon sa duha ka sakay sa Mitsubishi Mirage.
Gibutyag ni Libra Mea Damasing ang RTMI Administrative Manager nga gipas-an sa ilang opisina ang galastuhon sa medikasyon sa mga samaran sa aksidente.
Gihisgutan usab ni Damasing nga natumba ang ilang unit dihang wala na makabalanse ang nagmaneho sa bus human gibangaan.
Gisugid usab ni German Avenido ang Branch Manager nga gibutangan nila og Global Positioning System kun GPS ang mga bus nga nagbyahe aron makontrolar ang dagan sa sakyanan.
Makanunayon usab nga naghimo inspeksyon sa makina ang technical department sa RTMI aron masiguro nga naa sa luwas nga kondisyon ang bus una mobyahe.
Bag-o palang naglusad usab sila og suprisa nga drug test ngadto sa ilang mga drivers.
