Usa ka seremonya ang gipahigayon, buntag kagahapon, sa New Provincial Capitol Complex sa Marawi City, alang sa mga kanhi sakop sa teroristang Maute-ISIS group, kinsa una nang mitahan sa militar aron mobiya sa grupo.
Matud pa ni Col. Romeo Brawner, Jr., commander sa 103rd Infantry Brigade, Philippine Army, nagsugod ang maong mga combatant sa pagsurender dihang nakita nila nga naipit na sila sa giyera sa Marawi City.
Nagkadaghan sila pagkahuman sa lima ka bulan nga giyera hangtud nga nagpadayun na ang militar ug puwersa sa kupulisan sa paggukod sa mga nahibilin pa’ng mga miyembro nga nagpadayun sa ilang recruitment sa Lanao del Sur.
Kasagaran sa maong mga returnees nalambigit sa nahitabong giyera sa lungsod sa Butig niadtong tuig 2016 samtang adunay mga grupo nga gihimo untang reinforcement sa giyera sa Marawi niadtong tuig 2017 apan wala na makasulod.
Aron dili na sila mobalik og pasakop sa grupo, hatagan sila og panginabuhian o livelihood nga makatabang kanila ug sa ilang pamilya.
Usa sa mga nakahaylo kanila nga magpasakop sa grupo sa mga terorista mao ang salapi nga ibayad kanila ug sa ilang pamilya matud pa sa militar.
Apan giklaro ni Brawner nga adunay panawagam ang gobyerno kanila: una, dili na sila mobalik sa grupo; ikaduha, ihatag sa militar ang mga impormasyon nga ilang nahibaw-an kabahin sa uban pang mga terorista; ug awhagon ang ilang mga kaila ug mga kabanay nga dili magpasakop sa grupo.
Tungod niini, namahayag si Lanao del Sur Governor Mamintal Adiong, Jr., nga magpatabang ang probinsiyal nga kagamhanan sa nasudnong kagamhanan tungod kay dili tanang gikinahanglan sa mga returnees mahatag sa provincial government
