Davao City – Arestado ang usa ka kagawad sa Barangay Bunawan, syudad sa Davao gumikan sa droga kaganinang buntag, Mayo 27, 2020.
Sa intebyu sa DXDC RMN Davao kang Police Capt. Rosario Aguilar, Spokesperson sa Davao City Police Office (DCPO) giila niini ang suspek nga si Roque Bernardino Bosque alyas Bikong, 36-anyos, taga Purok 10, Bunawan ug Kagawad sa Bunawan Proper, Davao City.
Atol sa operasyon sa Special Operations Group sa DCPO, Bunawan Police, Special Weapons and Tactics (SWAT) ug Criminal Interdiction Unit (CIU) nasikop si Bosque sa iyang panimalay ug nakuha sa iyang posisyon ang- daghang droga, mga armas ug granada.
Gikanayon ni Aguilar nga usa ka bulan nga gipanid-an ang suspek gumikan sa report ngadto sa otoridad nga nalambigit kini sa iligal nga mga aktibidad.
“Isa ka bulan na ni siya nga ginapanid-an tungod siya may ginasumbong pud atong mga nauna pa nga mga nadakpan nga kana siya nalambigit pud anang mga iligal,” esplikar ni Aguilar.
Duha ka kaso ang atubangon sa kagawad nga mao ang paglapas sa RA 9165 kun Comprehensive Dangerous Drugs Act of 2002 ug kalapasan sa RA 10591 kun Illegal Possession of Firearms.
RadyoMaN Kirby Manzon
