Na ica segunda vez tiroteo nohay mas salva el un Kagawad de Sta. Catalina despues el un armao criminal ya repica conele de tiro serca na su residencia na Betty 2 Drive, Sta. Catalina enantes aga.
El victima si Michael Magallanes y Tinaytina, 38, casao, na primer termino na posicion de Kagawad quien ya sostene cuantos tupada de bala na su cuerpo.
Con Magallanes ya lleva pa entabla na un hospital pero ya declara con este maga doctor muerto porcausa del maga fatal tupada de bala.
Si Magallanes muntao na su motorsiclo y Nuevo pa lang ya sale na diila casa y ta viaja pa afuera del Sta. Catalina cuando el criminal quien ta espera conele derepente ya arangca pistola y ya rega de bala conele.
Este ya el ica segunda vez incidente donde el primer vez amo del pasao año tiene quien ya sopla tambien de tiro con Magallanes serca na su casa y ya tupa na su pies.
Asegun con Consejal Jimmy Villaflores, el tiempo capitan le del Sta. Catalina ya man appoint le con Magallanes como el barangay treasurer despues nohay esta gana kagawad na su primer corida na barangay.
Mas de ese, si Villaflores ya habla nohay menciona si Magallanes si tiene ba conele agraviao despues el primer incidente donde ya tira conele na pies.
Base na record aserca el personal background di Magallanes, buen gente este y recio este ayuda na comunidad como antes miembro del Rotary West.
