General Santos City— Giangkon ni City Councilor Atty. Jose Edmar Yumang nga adunay migawas nga mga impormasyon nga lakip ang iyahang pangalan sa listahan sa mga high value target uban silang Kagawad Atty. Dominador Lagare Jr., Atty. Franklin Gacal Jr., ug Atty. Ramon Melliza ingon man silang Brgy. Batomelong Kapitan Aserin Ngilay ug Brgy. San Jose Kapitan Adul Rahim Faidumama.
Apan gipaklaro ni Kagawad Yumang nga walay kamatuuran ang maong mga akusasyon gumikan bisan siya ang wala pa personal nga nakakita sa hulagway sa gitawag nga shabu. Busa kumbinsido siya nga pagpangdaut ug pagpanghadlok lang ang maong migawas nga impormasyon.
Pagpaklaro man usab ni PDEA 12 Director Valente Cariño, nga dili niya makumpirma o ma-deny ang maong impormasyon nga gibutyag ni Kagawad Yumang gumikan ilaha kining ginakonsidera nga confidential information.
Apan iyahang gipaklaro nga tanang mga impormasyon ang ilaha man nga ginavalidate ug ginasuta pag-ayo aron nga dili mabutang ang alanganin ang ilahang mga operasyon.
Pamahayag niya nga sa karon, aduna silay mga ginamonitor nga mga lambigit sa illegal nga druga kung asa mga high value target gyud ang focus sa ilahang ahensya sa pagpahigayon ug mga operasyon.
